Tri dana nakon uspješno odigrane prve utakmice polufinala Kupa protiv Iskre, fudbalere Mornara čeka važna utakmica sjutra u Bijelom Polju protiv Jedinstva Franca. Utakmica počinje u 16:00 sati, a prenosiće je TV Adriatic Sport.
Mornar se nalazi na šestoj poziciji sa 37 osvojenih bodova, dok se Jedinstvo Franca, sa 31 bodom, trenutno nalazi na devetom mjesto. Pobjede i novi bodovi su imperativ za obje ekipe.
Nikola Vuković: “Nije mi strano da igram u napadu !”
Strijelac gola protiv Iskre, Nikola Vuković, dobro se snalazi u defanzivi i ofanzivi Mornara, sve češće dobija zadatke u napadu od šefa struke Mornara Zorana Đuraškovića:
“Nije mi strano da igram u napadu s obzirom na to da mi je matična pozicija krilo, moje je da dam sve od sebe na bilo kojoj poziciji u timu i da pomognem ekipi kako god mogu.
Mislim da je gol nagrada za trud i rad koji ulažem i daje mi dodatni vjetar u leđa da nastavim da radim još jače i pametnije.”
O predstojećem meču dodao je:
“Čeka nas teška utakmica i teško gostovanje, ekipa koja svojim kvalitetom ne pripada mjestu na kojem se nalazi. Svjesni smo da nas dobar rezultat drži u trci u ligi, daćemo sve od sebe da ga ostvarimo.
Borimo se na dva fronta i vjerujemo u svoje kvalitete, a uskoro ćemo ponovo igrati u Baru na našem stadionu i mislim da će sve biti dugičnije i da bi ova utakmica bila dodatni vjetar u leđa za bitan period ispred nas.”
